స్విగ్గీ, జొమాటో యూజర్లకు షాక్.. వర్షం పడినా జీఎస్టీ బాదుడే!

ఆన్‌లైన్‌లో ఫుడ్ ఆర్డర్ చేసేవారికి ఇది బ్యాడ్ న్యూస్. స్విగ్గీ, జొమాటో వంటి ప్రముఖ ఫుడ్ డెలివరీ ప్లాట్‌ఫామ్‌లు వసూలు చేసే డెలివరీ ఫీజులపై ప్రభుత్వం 18 శాతం వస్తు, సేవల పన్ను (జీఎస్టీ) విధించింది. సెప్టెంబర్ 22 నుంచి ఈ కొత్త నిబంధన అమల్లోకి రావడంతో వినియోగదారుల బిల్లులు పెరిగాయి. ఈ మార్పుతో ఇకపై ఫుడ్ డెలివరీ మరింత ప్రియం కానుంది.

ఇటీవల జీఎస్టీ కౌన్సిల్ తీసుకున్న సంస్కరణల్లో భాగంగా ఈ-కామర్స్ డెలివరీ సేవలను కేంద్ర జీఎస్టీ చట్టంలోని సెక్షన్ 9(5) పరిధిలోకి తీసుకొచ్చారు. దీని ప్రకారం, డెలివరీ సేవలను నేరుగా అందించకపోయినా, సంబంధిత ఈ-కామర్స్ సంస్థలే (స్విగ్గీ, జొమాటో వంటివి) వాటిపై జీఎస్టీ చెల్లించాల్సి ఉంటుంది. గతంలో డెలివరీ ఛార్జీలను డెలివరీ భాగస్వాములకు ఇచ్చే చెల్లింపులుగా పరిగణించేవారు, దీంతో జీఎస్టీపై స్పష్టత ఉండేది కాదు. తాజా నిబంధనలతో డెలివరీకి సంబంధించిన ప్రతి రుసుముపై 18 శాతం జీఎస్టీ తప్పనిసరి అయింది.

మోర్గాన్ స్టాన్లీ విశ్లేషణ ప్రకారం జొమాటో సగటు డెలివరీ ఫీజు రూ. 11-12 ఉండగా, దానిపై జీఎస్టీ రూపంలో అదనంగా రూ. 2 భారం పడుతుంది. అదేవిధంగా, స్విగ్గీ సగటు డెలివరీ ఫీజు రూ. 14.5 కాగా, పన్ను రూపంలో రూ. 2.6 అదనంగా చెల్లించాల్సి వస్తుంది. కేవలం డెలివరీ ఫీజు మాత్రమే కాకుండా, ప్లాట్‌ఫామ్ ఫీజు, వర్షం పడినప్పుడు వసూలు చేసే ‘రెయిన్ ఫీజు’ వంటి ప్రత్యేక చార్జీలపై కూడా ఈ పన్ను వర్తిస్తుంది.

ఈ కొత్త పన్ను విధానంపై సోషల్ మీడియాలో నెటిజన్లు తీవ్రంగా స్పందిస్తున్నారు. ఓ వినియోగదారుడు తన బిల్లు స్క్రీన్‌షాట్‌ను పంచుకుంటూ "చారిత్రక జీఎస్టీ సంస్కరణల తర్వాత దేవేంద్రుడిని కూడా పన్ను పరిధిలోకి తెచ్చారు. ఇప్పుడు వర్షం పడితే రూ. 25 రెయిన్ ఫీజు, దానికి 18 శాతం జీఎస్టీ  కలిపి రూ. 29.50. త్వరలో సూర్యరశ్మికి కన్వీనియన్స్ ఫీజు, గాలి పీల్చినందుకు ఆక్సిజన్ మెయింటెనెన్స్ చార్జ్ కూడా వసూలు చేస్తారేమో" అంటూ వ్యంగ్యంగా పోస్ట్ చేశారు. మరోవైపు, బ్లింకిట్, స్విగ్గీ ఇన్‌స్టామార్ట్ వంటి క్విక్-కామర్స్ ప్లాట్‌ఫామ్‌లపై ఈ ప్రభావం పెద్దగా ఉండదు. ఎందుకంటే వాటి డెలివరీ చార్జీలు ఇప్పటికే పన్ను పరిధిలో ఉన్నాయి.